(11)
Cingno te kiangah kha lang val bang hong omkhit ciangin Tuangno in ansai khatah Khaipu nasep ngahsak hi. A nasep neih masiah Cingno tawh hong kikhawl thapai a, Cingno in lah na ngaihbawl mahmah ahih manin Khaipu in hong ngai mahmah takpi ta hi.
Na asep hangin zanpen Cingnote kiangmah ah hong ciah tangtang zaw hi. Nitak khat Pasal atheihngeiloh kum 40 val bang apha dingkhat Cingnote kiangah honghawh hi. Cingnote unau tawh a kiho nateng za ahih manin Khaipu in lamdang sa mahmah in nasa mahmah hi. A heh theih nading thulah omlo ahih manin heh ngamlo in Cingno kiang ah damtakin hong dong hi. Cingno in zong Thangno thuakna hehpih veve ahih manin apa kuahiam cih leh a u Thang gensimna simlo aman takin thu hong genta hi.
***************
Cingno te pen a U Tuangno tawh unau nihbek mah hi uha, aneulai in a nun nusia baiih ahih manin, a pa’ khoi leh khan suahsa ahi hi. Kawlpi ah teng uh a u Tuangno Malay apai khitciangin apa tawh amaugel bek hong om uh hi. Apa pen bel sum deih mahmah khat hi a, sumlehpai thu ahih nakleh kuamah khuallo, alungtang khauh mahmah ahih manin Cingnote unau in zong apa uh lau in zahtak mahmah uh hi.
Cingno tansawm zo in college kumkhatna hongkah laitakin a lamet lohpi in a pa’n thukhat hong gen hi. Malaysia a om zikhat nei ngeikhin alawmte khat i’ ziding (tualai hun a paudan in “percel” ) dingin a tanu hong sawlta hi. Cingno zong utvetlo ngaihsunzo ngiatlo ahih manin kapliang in apa hong nial hi. Apa’ lungsim lah atheihsa ahihman leh, aneutung akipan tuciang dong acing akem akhansuah apa’ thu amanloh ding kiawi samlo ahih manin haksa sapimah in hong mang ta hi.
Cingno Malay atun ciangin a u Tuangno kiang ah kinga phot hi. A pasal dingpa api dingin hong pai a amel uh hong kimuh takciangin amasang kum 20 banga uzaw ding papisa khat nahi ahih manin zuihpah ding haksa hongsa mahmah hi. A u Tuangno in zong theisiam ahih manin tawmvei sung amakiangah a om phot nadingin gen a, tuapa zong amah bek ciahkik hi. Tuazah asawtlo a Khaipu amau kiang atung ahi hi.
***********************
Cingno genteng azak ciangin Khaipu in nasa mahmah a, ahi zongin akikhel kikthei dingthu ahihloh lamthei ahih manin azuih ding lampi ong theipah hi. Mi’ zi hikhin mawk ahih manin utleh utkei leh amahmah akihepkhiat akul hita hi. A lungsim sung pan “banghang mi’ zi ding hi napi hong kipiapia na Cingno” ci in Cingno’ tung khasia mahmah ahih manin apuanlom zial in Cingnote inn pan hong taikhia ta hi. Cingno in a khamhangin kuama kham zawhding hinawn lo hi.
Khaipu ama tung khasia leh heh mahmah ahihlam thei ahih manin Cingno zong alung nuam hetlo hi. A u Tuangno’ sawlna bang a gamta ahihhang Khaipu tawh hong ki thuahthuah uh teh alungsim hoihzia leh a thuman ziate thei ahih manin Cingno in zong hong ngaikha pian veve hi. A pasal dingpa tawh ateh bangciangin kikhai salua in Pammaih zong sa mahmah hi.
Cingno ihmu theilo in lupna tung Khaipu bekbek hong ngaihsun hi. A pasal dingpa hoh taisan in Khaipu belh maiding khawngin hong ngaihsun zel hi. Aihang apa’ thuman natawh hiciang tungsa tuabangin agamtat dinglah kingam taktak lozel hi. Asawtlo in Khaipu’ laingah ding amau kiang hong tung ahih manin a u Khai Phone a setset hangin Khaipu in Cingno phone ahih nakleh lenlo sang nuam vetlo hi.
Khaipu in a gamlapi a paikhiatmang nophang a nasepna mah ah khacin dong sepsuak dingin hong khensat hi. Cingno kiangpan phone hong lutlut hang sang vetlo hi. A gel kholhsa mahbang in khasum asan khitciang Cingnote kiang ah hongpai kik hi.
Cingno zong khaipu amuh ciangin nuamlua in agending theivatlo liang hi. Khaipu zong tuabangmah hi a alungsim a ageelkholh nabang ki akam pan hong pusuak hetlo hi. A ipsawk in lai pi khat a aguansa sum alak khitteh
“Na u Tuangno hong tunteh tuciang nong kep nong panpihna te uh lungdam nacih sak in la,, hiah kong om sung innsap leh an man tangding hih napiaksak o.”
Cingno in a sum sangnuam vetlo in anolh hang Khaipu utvetlo in pusuak in ciahsan vingveng hi. Cingno in a u Khaipu aciahkhit lian leh alai piakding phawkkha pan ahih manin phone hongset kikpah hi. Cingno kiangpan phone hong lutciangin Khaipu zong thakhat in hong kilehkik pah a, kongkhak hongpheivat in,
“ Ka gen mangngilh om aih cianga hong kilehkik hing ei, Cikmah in phone hong set nawnkei o, na zana?”
“Hiah na laingah ding om, den a hong piakha manlo kaih cianga u Khai”
Khaipu zong Cingno gen azak ciangin a maigum tawm hong kiamzaw deuh a, Cingno khut tungpan laikhak alak khitteh hong ciahkhia
vingveng hi.
Khaipu in Lai-ip hong in laikhak hong et aleh Anu leh Mangnu khak nahi hi. A nu’n innlam thupiang khempeuh gen hi. A u Thangno
tungtawn a Pasian thupha asana, leiba teng lohkik khitna, Amah zong cidam sitset ta a a omna te gen in, amanlang theithei a inn a
ciahnading in sam hi. Lamsap ding naneih kei aleh hong khak nung ciliang hi. Mangnu in bel a lungzuan khuangaihna leh tuni dong citak taka a na ngah ngiungeuna leh innlam a hopihzel nadingin gen hi.
Laikhak asim khitciangin Khaipu a khitui hong luang hi. A neu lai thu akipan azin khiat zong nulehpa alungkimsak mahbang in ama hanga nulehpa zong milak ah a angtan mahmah laithute, apaikuan a mangnu tawh a kam kivaikhak tangtang hunlai te bantak in hong ngaihsun toto hi. A neulai a nulehpa lungdam sak mahmah napin agol cianga a lungkhamsak ahih nate ngaihsun in amahbek deihtakin adakkhawng kawmin a phone leilak a dengzan hi. “Aw, Hakai paktak lung heng” acihlian kaiveh maw ci-in akampan in paukhia hi.
A hehnem ding omlo ahih manin akhituite amahmah in hongnul in a handbag kuah kawmsa in hong paipai hi. Cingnu te’ kiang leh amau’ zonsaksa nasepna lah zuatkik sawmnawnlo ahih manin tupna sawmna mel omlo in hong paipai aleh khua hong zing ta hi. Thu ngaihsun kawmsa in akim apam khuakha mello inhong paipai aleh palik tawh hong kituak takpi ta hi. Palik ten thudong uha, permit aneihloh lam uh thei ahih manin hong man ta uh hi.
***********************
No comments:
Post a Comment