(12)
Nu Vung zong zato pan atuah zawh sawtpian ta ahih manin hong dam hong thahat kik mahmah ta hi. Thangno’ sawlna om mahbangin a sumkhak cianlai teng tawh a inn uh hoihtak in hong puahpha khinsak uh hi. Asawtlo in Thangno in sum hong khakkik leuleu hi. Pamungte nupa in zong hibang a ikepcip sang ci-in van nengneng pawlkhat lei in saklam ah zuaktoh ding hong sawm hi.
Pamung a vanzuak nasep hong senpi gawp ahih manin kalkhat bang inn ah a tawlngak khitteh avan zuakdingte kaikhawmin hong kuanto kik leuleu hi. A vanpuak teng a khotkhit the innlam zuan in hong ciahkik uhleh, lampi a guahzu in Ciau tui nakhang ahih manin Pamung tui in tai in hong sita hi.
Apa hong nusiatna thu azak phet in Thangnote alawmta uh hong ciahpah vingveng uh a avuini lapin hong tung uh hi. Thangno hongtun hang Khaipu tawh thu kiza theivetlo ahih manin nu Vung dah in kapkap hi. Mangnute nuta leh aveng apam in nuvung tuhpih in hehnem ngeingai uh hi. Kawlpi pan Kimnu tenuta zong nu Vung hehnem dingin hong paito uh hi. Kappu nu leh Mangnute nuta in nu Vung gei ah tutpih den uha, Kappu leh anau Kimnu in lengna dangte hoihtakin do sak uh hi.
Pa Mung hong nusiatnathu azak hangin Kawlpi a apano uh a galin paito lo hi. Ahih hangin Thangno hong ciah cihthu azak ciangin Palikte cialin Thangno aman dingin paito sak hi. Nungdeuh Thangno’ lawhcin nathu azak akipan hong ciah aleh matsak ding a gelkholhsa ahi hi.
Lengna dangteng ciahkhin in Mangnute nuta leh Kappute nutateng bek omlai hi. Kongkhak hong kikiu in ahon uh leh Palik nih hong lut in Thangno matding hong sawmta uh hi. Palikten Apano cycle gukna thuhang ahihna thu gen a nu Vung in zong alohkhitna thu hong genpah hi. Agengen uh hang hongzui photphot hen, zumpan kisitpha zawni ci ahih manin Thangno azui dingin hong kithawi ta hi. Kappu zong palikte deihlohpi mah alawmpa Thangno zuidingin hong kithawi hi.
Nu Vung dahlua in acih nading theilo hi. Thangno in apaikhiat dingteh anukiang ah vazui photphot ningin kaguk lohlam Pasianin
thei ahihteh zingah thaiah cidamin hong ciahto kik ningei nu, na patau mahmah kenmaw ci-in hoihtak avaikhak khit teh alawmta un palikte mawtaw zui in Kawlpi lam zanpai ta uh hi. Nu Vungte inn a om teng zong lungkhamin tuazan thapai khitui luangin thu ngen niloh uh hi. Thangnote kawlpi atun uhciangin Palikzum ah thu nasia takin kisit hi. Thangno in zong ahibang lian in aneng atawng in gen hi. Palikten zong khensathak sapian ahih manin Thangno genna sung a khuanawl buukno acih atakpihiam ci in en ding in hong paipih uh hi.
Buuk gei hong tun uhciangin asung ah mihusa za ahih manin daitak in hong gep khiankhian uhleh no.4 zatui zang a om mi thum na om ahih manin Palikten zong man pah uh hi. Nu Vungte thungetna Pasian in dawng ahih manin Thangno’ cycle taipihpa Paupi zong na kihel kha citciat hi. Thangno gen bangin palikten adot ciangin Paupi in zong nialthei nawnlo ahih manin amah lah amah hong kigen ta hi.
Thangno te lawmta zong manlang takin Tedim lam ciahto kikpah uh hi. Thangno mawhban na omnawn lo in hong tungkik ahih manin nu Vung nuam mahmah hi. Kappu ten zong kawlpi lam hong zuanta uh a Thangno te nuta bekmah inn ah hong om uh hi.
Paupi leh alawm tegel palikten man in thu sit uh hi. Paupi in Thangno’ cycle ataipih a azuaksim nathute amanin hong gen hang azatuh vankham zatuite angahna phualuh gen nuamvetlo uh hi. Agen matenguh satgawp in bawlsia ahih manin atawpna ah hong gen ta uh hi. Palikten abulpi theinuam uh ahih manin zong tua agenna mun ah paipahlo in asimthamin en in gemgem phot uh hi. Khakhat acin khitteh vankhamsepna bulpi thei ahih manin umcih in tualai a asem khempeuh hong mankhin ta hi.
Lungsimsia lua a Thangno abawlsiatnop na tengin amah nangawn a awk ahihlam akitheih ciangin a pano kisik mahmah hi. Akisik hang in khantawn thong lam manawh apai hita hi. Amah tawh kibanga paikhawmpen a lawmpa nidanga nu Vung kiangah leibasik a apaipih mitha golpa ahi hi. Tuapa pen Malaysia a om atapa Tuangno kiangah Khaipu bawlsia ding a asawlpa, ama masuan asenpi tuam khakleh ci a atanu Cingno amakhangual papisa khat I khutsung ah apiakhiapa ahi hi. avawh bangin hong attuak ta uh hi.
*************************
No comments:
Post a Comment