( 9 )
Thangnote lawmta mapai takin na hongsem toto uha, a singat ding khempeuh zota ahih manin a pute’ innlam manawh in hongciah uh hi. Apu in mundang khat ah nasep ding neilai a, amau lawmta mah in a sepsuak nading un ngen ahih manin hong tamlai uh hi. A nasep hunsung a akholkhol uh saphulip leh vom sinkha te apu in akituakzah dingseh in leisak hi.
A lawmta in khuasung hong vak kawikawi uh a, innlam khakding van pawlkhat lei uhhi. Azing ciangin a veng pana hongpai sumbawlte kiangah vapai uha, a sumteng leh avanlei teng puasak uhhi. Asawt lo in apute genna mun ah nasem dingin hong kuankhia leuleu uh hi.
***************************
Pa Mungte nupa zong genthei takin hong nungta uh hi. Inn a pon uhhangin Khaipu khualzinna leh Thangno hanga a panote kiangah leibat lohna in bei ahih manin Nu Vung kibawl nading zong cingzo tuanlo hi. Tua ahih manin nektawm ding nangawn haksa sa mahmah ahih manin zatui nangawn hong leizo nawnlo uh hi.
Mangnu in zong ahihtheih zahin adon pih zel hangin nu Vung hong zawm tektek ta hi. Atawpna ah Pa Mung in a vengvua zatuilam athei mawhlokhat sam in ki ensak uh hi.
"Bangmah a lamdang gending omkei in, gilpina lah na theihsa uh hia ,bangdia pum thuakthuak mawknai vua? Gilpina cihpen akilawh toto hi-in, amanlang penin na at uh kul in cei"
Pa Mung in acih nading thei nawnlo in alung hongkham mahmah ta hi.Sum leitawi nading lah hawilo ahih manin ahaksatna khempeuh Pasian ap in thunget bek mah tawh ma hong pang hi. Tualaitak in a vengte khat hong hawhin Thangno’ vankhak leh sumkhakte hong pia hi. Pa Mung zong alungdam lua ahih manin kuamah zong zasak man nawnlo in manlang takin Zato paipah uh hi. Zato atun uhteh siavuanpipa na omlo citciat ahih manin thusau ngaihsun man nawnlo in tuani mahin Kawlpi hong zuansuk pah uhhi.
Kawlpi zato atun ciangin akisap nabangbang Kappu’ pan navan sak ahih manin haksat luatna bangmah omlo hi. Zato a a omhun sungteng uh Kimnu in zing leh nitakin anpuak tawntung hi. Pa Mung in Kimnute innkuan i panpihzia leh alungsim puakzia uh atheih ciangin lamdang sa mahmah hi. Vengkhat a a omkhop lai un Thangno pen laisim nuamlo in amau kiangta ah ahawhdet laikhawng a, avengte hanghi ci a asim muhdah giugiau nate hong kisuang mahmah hi.
"Khuazing dekta napai photning pa Mung, Zing ciang a ngeina bangmaw, vaikhak thakding a omdia?
"Om tuankei ei Kimnu, nozong na pata un hong buaipih mahmah uh cei mateh"
"Bangmah buaina om tuan kei e"
Pa Mungin Kimnu a etkawmin a lungsimtawng panin bel ‘ka tanu hong hiziau thei lecin ut mahsing e’, naci giugiau hi.
A zingciang Nu Vung sisan kisam a, a piadingmi a hunlap in muzo lo ahih manin Kappu’ pa leh Pa Mung buai mahmah in lungkham mahmah uh hi. A pianuam sunsunte ah a sisan nam kibanglo ahih manin kipia theilo zel hi. Nitak lam ciang mizong a abuaikal in mikhat in si nahawm ahih manin hatsatna omlo in hong senpi toto uh hi. Tuabang teng tawh kalkhat khit khawng ciangin zato pan cidamin hong tuakkhiata uh hi.
Zato atuah khituh ciangin, Kappute innkuan tung lungdamkoh annek pihna hongnei in nuamtak in hong kiholim ngeingai uh hi.
" Kappu pa, nunga Nu Vung si ahawm pen kuahi peuhmah hiam, lungdam kako zokei zongun ami beek theinuam ve ung aw, nong na kansak lai lecin akingah dia?"
"Siavuanpa’ gendan ah pen, Lungsimhoih nei mahmah khat ciziau in, amin kigen nuam vetlo ci, ei zomi numeikhat cihciang beka aki thei aiveh, lungdam ihkoh dingteng mah a utlo hihtuak zawveh aw. Ih kan nop hang akikan thei ding hilo hiveh aw, Hih banga lungsimhoih anei ei milak ah tamnai hetlo ding hi ei."
"Hi peuhmah ei, eizong bangmah a kithuk kik zoding cih hituanlo ahih teh, I biak Pasian in thupha tampi na piaksak tahen o leh"
Kappute inn ah zankhat tamthuah lai uh a, a thaiciang in Pa mungte nupa in khamtung lam hongzuan tokik ta uhhi.
********************
No comments:
Post a Comment