( 5 )
Pajero mawtaw vom khat in mual leh guam kantan in nawhtak in hongtai hi. Agei a mitlimlangvom bulhpa’n nawhhawl in sawl ahih manin mawtawhawl mi thagol mahmahpan zong hong nawhhawl mahmah hi. Asawt lo in Tedim hongtung uh a munkhat ah hong khawl in anih un hong tuakkhia uh hi.
"Ha, panote lah nahi vua, tumsuk vo, nu ka panote hong hawh ei."
"Na pate e?"
"Kapa nasem kuan, kanu innsung ah om e"
"Na Nu vasam sin"
Nu Vung hong pusuah ciangin Khaipu’ Pano in, Thangno in a cycle tul 200 man hong guksak ahih manin kha4 sungin nongloh kei uhleh nasiatakin thu hongbawl ding hing ci-in hong gen hi. Nu Vung bangmah genkhuan pialo in aanaa( zawhthawh thu) tawh letmat thuh in sawl hi.
"Tuabang ziauziau omthei dingmaw pano? Ka u Thang tuabangin gamta het…"
"Nang theih om kei nakamcip"
A Pano in Khaipu thugen nangawn gensak manlo in hapkhat suah ziau hi. Khaipu a lungkim theivet lo ahih manin a hapet in a khuttum zial tentan kawmin hong pau leuleu hi.
"Tuabang aih leh, keimah’n letmatthuh ning ei leh, kha li a kong loh zawhkei uhleh kei hongman sak vo leh"
"Nang letmat hoh bang a kimang dingsa na?"
"Nang sai om kei, ken nang hong hopih keng."
A Pano’ gei a migolpan nadawng ahih manin, Khaipu in zong hapkhat hong suah kikziau hi. Migolpa a khut bang zialiang hi. Khaipu genloh ulian nihlehthum zong a kitta hetlo khat ahi hi. Asiapa a zahtakna bek tawh bangmah a cikik ngamlo ahi hi.
Nu Vungin a cih nading om nawnlo ahih manin letmat hong thuh ta hi. A panote ciah dingin hong taikhiat uh ciangin Khaipu zong a hehsuak lua ahih manin dakkhawng in a khuttum tawh kawm tumvat hi. A Panote lawmta in konggei pan lehetkik in nuihsan hiuhiau kawmsa in ciahsan uh hi.Tua migolpa in bel anuihsan hang a lungsim tawng ah “na kithei phot o nangpa” ci giugiau hi.
**********************
Khaipu a lawmte khat i brithday bawl dingin hong kizawn ahih manin apate kiangah gen in hongzui hi. A lawmten zu ne ngeingai uh a Khaipu zong piapia ahih manin asawtna teh hongdawn ta hi. A lawmten zan hahding asawm hangin Khaipu anute lunghimawh dingdah in zan 11 pawl teh hong ciahkhia hi.
Pa Mungte nupa Thangno’ vai lungkham in kikumkum uh hi. Pa Mung asawtlo in hong ihmut pahhang Khaipu ciah nailo ahih manin nu Vung ihmu theilo hi. Nu Vung in mi husa khat za ahih manin hong ngaih a leh, zukham khat in Khaipu innmai dong hongkha ahihlam thei pah hi. Khaipu apate’ phawkding dah ahih manin damtak in kong hong in honglut khiankhian hi.
A dangtak ahih manin tuibel sung a tui hongdawn leh asin sinkhial kha ahih manin sual tungah hongkia hi. Gingdal ahih manin Pa mung hongphawk in a en khia dingin a thawhsawm aleh Nu Vung in zawhngeu hi etkul kei ci ahih manin Pa Mung tho nawnlo hi. Khaipu lau lua in sualtung ah bokcip hi. Kuamah hong thawhloh lam atheih teh damtak in lupna zuan in honglup leh ihmu sukziau pah hi.
Khai pu anu’n hongphot ciangin khangma kha ahih lamphawkin kisuang mahmah hi. Nidang hileh zingtho masa pen hi napin tun a nu’ phot a om mawk hi.
"Na pa zingvak hongtung leh hongthei ding ai maw, tho mengmeng o, A limlim in bangdia zudawn peuhmah nahia?"
A nu’n a zunek na thei gige ahihlam a theih ciangin Khaipu in zong anu tungah ki pulak in, nidang ciang ne nawn mahmah keining
ci-in gen hi. Tuzan a a belsin kiatsak khawng anu in ana theih lam, apa a thawh sawm nangawn anu in a nakhaam lam khawng hong kigen uh ciangin Khaipu in anu itna, a pasal leh a tate kikal a alemtuah den ahihna, a theiloh kal nangawn aphawkkhak lohkal ana it gige ahihna te hong phawk tektek hi.
xxxxxxxxxxxxxxxxxxxxxxxxxxxxxxxxxxxxxx
No comments:
Post a Comment