( 8 )
Khaipu Zangkong a tunciang a lungleng mahmah hi. Inn pan paikhia ngeilo ahih manin innlam hong phawk mahmah hi. Puaisate’ khemna nono a thuak teihang, khanih bangteh Malay zuan in hong lengkhia thei tasam hi.
Malay hongtun ciangin Furniture setzungpi khatah na hongsem hi. Nasem mi tamlua ahih manin khasum hoihlo in a boss te in giahna inn akipan a bangmah khempeuh gina don zolo uh hi. OT lah ngahlo a khasum zali khawng lakpan atuamtuam phiatthuah lai ahih manin bangmah gina cianzo nawnlo mawk hi. Ahih theihzah in apute kiangah thumbawl ngetbawl sam napi in bangmah kilamdan na omtuanlo hi. Kumkhatval bang hongsawt takteh apaina leibate loh zopan hi.Atawpna ah hithei mahmahlo sa ahih manin a laibu leh a lungmuang a omtheihna laidalte nusia in hong taikhia ta hi.
A tuncil lamin innlam hopih zelzel in a haksatna genzel napi’n sawt semsem, haksa sa semsem, innlam lah sumkhak zo mahmahlo ahih manin ki suangtak in hopih ngam nawnlo hi. Eimi a theih sunsunte kiangah om kawikawi in nasep hong zonzon hang, senpi thei mahmah lo ahih manin a lungkham mahmah ta hi.Nasep ding genloh anekding leh a lup nading mun nangawn muhhak hongsa ta hi.( Tua hunlai in Malaysia ah eimi tamlua nailo hi.)
A cih nading thei nawnlo in lungkia a a omlai tak phone hong kihopih in, amah a nathei ngei mikhat in keikiangah hongpai in ci-in sam hi. Khaipu zong lungdam kisa in tuapa kianglam hongzuan pah hi. Amah a sampa’ inn a tun ciangin nungak khat leh pasalnih na om in hoihtak in Khaipu omsak uh hi.
"Hih ka lawm Nangpu, amahpen kanau nu Cingno keipen kamin Tuangno hi-in, na u Thangno tawh nidanga a kithuahthuah kaiveh, tuamana nang zong lawma hongtuat pah hingei lawm"
“ Aw, lungdam ngel ei, Kei kamin Khaipu hi ei. Hihbanga ka cihmawh laitak a notawh kakitheih khak kalungdam takpi mah ei. Pasian in thupha hong pia hen o”
Khaipu in zong khitui luangdek zen in a lungdamna thu honggen hi. Tuakhit ciang in Tuangno in anau Cingno lupnakhan ah sam in kuama zakloh dingin huausim hi. Khaipu hong kisil a, aman ciangin alawmten zuna nadawn uh hi. Khaipu zong samsam uh ahih manin hai khat hong dawnpih hi.
"U Tuangno Malay natun a sawt naina?"
"Kumli khawng hipan e, Kanau bel khakhat zong pha naikei."
Hong kihoho uh a, Tuangnote lawmta zong a paupau kawm mahin hongkual suk in sualtung ah hong ihmu suak ziau uh hi.
*********************
Cingno in tutphasang ah tuto dingin sam ahih manin Khaipuzong hongtu to uh hi.
"Tanbangzah himah nahia u Khai ?"
"Tansawm phi khina hong pai hiveng, ongmaw onglo zong dongman nai kenge, Nang e Cingnu?"
"College kum khatna akah kimlai hiveng aw, tua tengmah hi ka heheh na"
Hong kiho toto uh a, Cingno in lawmngaih a neih ngeinai lohna khawng honggen ta hi. A kampaute a mithah dante pen Khaipu a zolzol leh a kipiapia tawh kibang ahih manin Khaipu in tulaitak a a dinmun leh innlam a Mangnu bang hong phawkkha nawnlo phial hi. Cingno in Khaipu’ lunglut theihtheih nading in thugen in Khaipu’ iplah theihtheih nadingin kampau hi.
Tua ahih manin, amel asa lah gensiat nading om lo,maitai, kamsiam kamtei mahmah nungak khat in hihbang in hong hopihpih ciangin Khaipu zong nuam hongsa mahmah in innlam a anusiat alawmnu Mangnu nangawn hong phawkkha nawnlo maita hi.
Ataktak in cileng Cingnote unau I papen Khaipu inn a omlai a apano tawh Thangno’ vai a inn hong pai ngeipa ahi hi. Khaipu Malay paicih atheih ciangin a tapa Tuangno kiangah Khaipu nasia taka a bawlsiat nading in sawl hi. Tuangno zong tuamana Khaipu asam hi a, anaunu kiang ah a ngai na kineih photphot in ci a asawl ahi hi. Tuangno te unau in apathu a nial ngamloh mah bangin Cingno in zong a u Tuangno thu nial ngamlo mawk hi. Tua hi a Khaipu pen Cingno I hemlam tongdam leh amelhoihna nuai ah hong lutkha ta hi.
***************************
No comments:
Post a Comment