(14)
Cingno alawmnu’n phone set in Khaipu inpan ataikhiat na thu gen ahih manin Cingno zong a inn ah hong ciah hi. A u Khai in a muhdah mahmahna thei ahih manin nasa mahmah hi. Apan lah nusia khin, a u Tuangin kawlgam ciahsan khin, a u Khai a ngaihluat manbek a Malay ah a omlai ahih manin na sa semsem hi. Khaipu in amah angai kei phial zongin a thugennopte beek themveisung ngaihsak le hut mahmah hi.
A hihzongin Khaipu in amel nangawn a munuam nawnngiatlo hizen ahih manin thuakhak hong sa mahmah hi. Asawtlo in kawlgam a om a u Tuangno in zinei cihthu zalai ahih manin amahleh amah akikhualna teng hong bei sesem ta hi.Cingno in a u Khai in a thahphial leh zong a singam zahdong dingin hong khensat in, ava kipum ap ngiatdingin Khaipu hong zong kawikawi kik ta hi.
Khaipu in gamgi pan a apipa’ sumte athalawh masakpen mahtawh loh masakpen dingin ngaihsun hi. Amin atheih hangin a omna leh a phone nambat theilo hi. Ahizongin tu tadihin aloh nading sumlah nei nailo, Cingno tawh akimuhna phual ah lah paikik nuamlo ahih manin kan nailo phot hi. Nasep akipat zawh asawtlo in senkumthak hong tung ahih manin aputen asai uh kalkhat sung hongkhak uh hi. Tua senkumthak sungin Malaysia a om eimi biakna makaiten kawlgam pan Pasian thugen siamkhat samin KL khualai a om biakinn
lianmahmah khat kawm in nasiatakin Pasian thugenna nei uh hi.
Papiangte innkuan zong kikhawm dingin hong kithawi ngeingai uh hi. Khaipu zong azolzol uh hangin ngahzolo ahih manun a innkuanun hong paita hi. Khaipu Pasianthu azakloh sawt mahmahta in painuam mahmah hi. Ahih hangin abeisa anuntaknate angaihsut kikciangin kisuangtak inmilak apaiding amaizumin kuamah mai mungamlo hi. Tuaban ah Cingno tawh akimuh khakding zong utlo ahih manin nikhat zong pailo inn inn ah amahbekta om den hi.
Khawmpi hong mansiangta a, aputen sai hongkik nailo ahih manin papiangte innkuan zong shopping paidingin hong kithawi ngeingai uh hi. Khaipu lah milak uttuanlo ahihmanin angeina bangin inn ngak zel hi. Papiangin kikhop lah nikhatzong pailo nahihteh Siapa hunzatte nazaknop aleh cimphawng nangaihnop leh ci-in sermonte a record na a phone nusiat hi.
Khaipu amahbek innngak in papiang phone pan in Pasian thugennate hong ngai hi. Amasa in Tapa taimangpa thu leh innlam phawklo a amangthang eimi Malaysia a omte agenna thu ahih manin amah sukha mahmah hi. Adangkhat hong ngaihkik ciangin Nute’ itna thu nasiatakin gen ahih manin alungsim tawngdong sukha in nasa mahmah hi. Nute’ hong itna pen; tehpihtheih omlo ahihna, tate tungpan bangmah alametlohna, leh asia penpen a ginalo penpen te pen nuten it penpen zaw ahihna te azak ciangin ki ip zonawnlo in hong kapkhia ta hi.
A nu itna nakpi takin hong ngaihsun kika, anu a hongpih ngeilohnate hong kisik mahmah hi. Anu itna khutin amahsam den ahihnate hong phawkta ahih manin lamsap khopding angah phetin innlam zuatpah dingin hong khensat taktak ta hi. Tua thugan siapa in athugen teng amanteh Malay ah ni3 tamlai ding ahihna leh dotnop hopihnop aneite in aho nading phone nambat zong zong gen hi. Khaipu zong tua Pasian thugen siapa ciahnailo ahihlam thei ahih manin phone set a ahaksatna leh alunggulhna bulpite gen in phone sungpan in thu angetsak nadingin hong ngen ta hi.
**************************
No comments:
Post a Comment