( 4 )
"Nu, an i ne lel dia, Ka pa ngakvet ding maw? "
"Napa ngak vetni , ih duh namel zong omnai mello ahih teh."
Thangno’ zinkhiat zawh Nu Vung a lungnuamlo in a ankam nangawn hong limlo semsem hi. Khaipu in anu ading a neih sunsun uh kelnawi leh aktui tangnih ta anu’ ading in tuambawl sak den hi. Pa Mung sigal hong tungta ahih manin Khaipu in anthuk pah in hong ne ta uh hi.
Pa Mung ahih leh bangmah pauhet lo in oma, a mai zong tai pha hetlo hi. Nu Vung in atheih hangin dong pak ngamlo ahih manin Khaipu in hong dong ta hi.
" Pa hong ciahhak tabuang cin vengte bang denpek a ciah. Thuthak om ahia pa na lung noptuak kei si e"
"Na an beek uh kham in ne phot le uhcin ci a honggen nailo hinge, na upa neihtak mah hilo dia?"
Thangno vai cih atheih ciangun Nu Vung leh Khaipu in theinuam ahih manin an zong duh nawnlo in dong a Pa Mungin hong gen ta hi.
Pa Mung sigalna pan hongciah khiat leh lampi ah Kappu’ nu leh pa tawh kituak uh hi. Veng khat a a omlai un naupangte’ hangin a ki etkhialh pian uh hangin hong kiho sam uh hi. Kappu’ nu in Thangno’ thu a zakbang in gen hi.
"Thangno’ thu na zanai mahna vua paMung?"
"Za hetlo"
"Alawm tegel in khem lah civen, tuateh a pano in matding a zong cihkhat tawh kokiang ah hongbu dan hiven tulaitak."
Pa Mung in akician a a dotkik hang in Kappu’ nu in lah tu a zahval gentel theituanlo hi.
"Ka pano in banghang maw ka u Thang a matsak sawm?"
Khaipu’ dotna kuama’n dawnglo uh hi. Amau tumtek in thu hong ngaihsun uh hi. Nu Vung in Thangno pen zu anek theih leh nulehpa’ thu a manloh cih lohbuang mitawh kitawng, mikhem leh guta dingin tuat thei ngiatlo pah hi.
"A Lawm tegel hang hi limlim in teh"
"Hi lian mahin cei. Paupi bang guta hilo maw"
Khaipu in hisa pah hi.
"Lungkham luatding hikei ei. Nulehpa thumang lo a taikhia hiven athuak lel ding hilo dia"
Agen hangin Pamung zong a lungnuam tuan hetlo veve hi. Nu Vung in a an ne zo nawnlo in innlim lam hong lutphei hi. Khaipu lah kel an a zonloh phamawh ahih manin annekna kuangte don man nawnlo in khuazin ma in kel an lo dingin hong kuankhia hi.
************************
Mangnu nu Vung ten hong hawh hi. A nu Vung tawh tawmvei a kiho khit ciangin anbuk teng phiat in, ankuang kisawp nailo teng sawp in inn nateng bantakin hong sem hi. Nu Vunglah sawtpi a thuak gilpinatna kibawl zolo ahihman a tuma kumkhat pawl akipan inn nasep nangawn a semzo nawnlo a, mangnu in aman hunhun in hong huhto zelzel mah ahi hi.
"Tuaci koihlel aw Mangnu, na u Khai hong tunteh semlel hen"
“Phamawh keilua nu Vung, ka u Khai in nisim a asep hiven konghawh sunsun beekteh keiman sembuang ning e. Aihang pasalte bel a sepnop loh manuh hi-in sem taktak leh eisang manlang zaw uh"
"Ei numeite khutma bel hongban tuan mahmah keisam uh e"
"Ta numei khat deihngel niteh maw nu Vung?"
"Deih lua kisa mah a ...,,"
Mangnu a gen khitphet in kisikpah hi. A Mai zong zumlua ahih manin a nu Vung’ thugen teng zong zanawnlo hi. A u Khaipu leh amah pen nuleh pan gawmding a a gelsa uh hi a, amau tungah zong pulak tuak khin uh hi.
Mangnu pen anu bek tawh om meigong tagah mahmah hi a, aneu tung akipan pa Mungte innkuan in a vansa uh a hihi. Nu Vung leh Mangnu' nu, nu Lun te unau in Thangno sangin thukhual leh thumang zawdeuh ci-in Khaipu tawh gawmding in athukimsa uh ahi hi. Tuadan kawmkal ah Mangnu in dena a kampau khak pen kisik mahmah in, a mai hong zum luata hi.
Asawt lo in Khaipu hong tunga, Mangnu in kuang a sawp a muhteh phamawh keilua ci-in a ban pan kai hi. A maizum lua a om Mangnu zong a maizum semsem ahih manin
"Ei sawp bangpeuh deihlo nahih leh phamawh kei"
Mang nu innpua lam pusuak in ciahkhia hi. Khaipu in zong lamdang savat ahih manin delhkhia in akhut pan len hi. Mangnu zong nakphetkhau a kaih mahbangin hong khawlpah hi. Akam uhtawh bangmah a kigenloh uh hangin anih un deihtakin ki en uh a, a lungtang sung panun aki-it tuakna uhte mit tawh ki pulak uh hi. Aden ciangin hong kipomta uh hi.
“Napai photning u Khai, khuazan luata”
Khaipu in akim apam hong phawkkik pan hi. Mangpha a kipaih khit uhteh innsung ah hong lut kik hi. A nute nalum khinta ahih manin sawtlua kha aitam ci-in Khaipu kisuang mahmah hi. A nu’ nekding zatuite a piak khitteh lupna lam hongzuan hi. Nu Vung zong neupan a khangkhia ahih manin na theisiam pah ziau hi.
Asawtlo in pa Mung hong ihmu ziau a nu Vung bel Thangno’ vai a lungnuamlo ahih manin thokik in lai hong at hi. Khaipi ahih leh dena Mangnu tawh a kilet a kipomnate ngaihsun kik in lupna tung amahguak mah nuinui phial hi. A nu hong lutphei a,
"Zing ciang zingtung taangtha nakuan kawmin zan a misite kiang ah bang inla, hih lai Kappu’ pate hong pia kawm in maw"
awleh nu”
*******************************
No comments:
Post a Comment