( 6 )
Kappu’ nulehpa sigal khamtung pan hong tunkik ciang in Thangno ading laikhak hong pua uhhi. Thangno zong asim pah a leh anu khak nahi hi.
Kong it, Thangno
Na paini a kipan ka lungnuam thei mahmahlo kacih akoici dan hi peuhmah e? Kappu’ paten zong bangmah theician lopi. Kacih nading uh lah theilo kahih uhteh kong huhtheihpen uh thungetna tawh hong panpih den ung. Kong vaikhak phatnop athupi pen in:-
*Na nopsak hun leh na gentheih hun, na tuahphat ni leh na tuahsiat nite in Pasian mangngilh ngei ken. Nulehpa zong hongphawk in.
*Tuabang natuah hunciang nuamlua / dahlua ken, asia leh apha hong kizom thei hi. Haksat gentheih natuah hunciangin a sangzaw kah nading kahlei bangin tuat in. Ih masuan pen eima khensatna tungtawn bek apiang hi a, gamtatsia gamta lo in citak peuhleng ei a khop thupha na om veve den lelding hi.
Tuazah ciphot ni, kazak phet a kong atvat hi-in, a kicing in hong zasakkik inmaw Thangno.
Hong it na Nu
Thangno in anu’ laikhak asim khit ciangin nakpitakin a lungsim hong kikhel hi. A masuan kalsuan nadingin thathak tampi hongngah hi. A tot nading lampi hoihtak hong teelthei pah hi. A lawmpa Kappu zong laiphi khinta ahih manin anih un Saklam sumthalawh dingin hongsawm uh hi.
****************
Kappu a sang vaitawh kisai vandingin va vakkhia a alawmpa kizui sak ngamlo hi. A vahna pan Thangno hong kizong ahihlam atheih ciangin kilehkik in alawmpa bu in sawl hi. Thangno zong abukpak nading om vatlo ahih manin tuibuk sung a puansawp a om Kimnu kiangah hongbu hi. Amah a zong mite hong tungta in, innsung khempeuh a zon khituh teh tuibuk zong hong etsawm uh hi. Kimnu in na dawngin kisil lai ing keimah hing ci ahih manin lut nawnlo uh a tuatawh a suakta hong suak hi.
"Hihveng ah zanin zong omlai ci a hong kigen sitset hi-in a om pimah hongkhem nahih uhleh na unau un thuakding nahi uh maw."
A zongte a pusuah kik uhteh Kappu zong amasuan mah vapai kik hi. Thangno ahih leh amah a zong mite thu ngaihsun khalo phial in, Kimnu bekbek hong ngaihsun hi. Silehsa kineh tak a tuibuk sungah hong om uh ciangin, anih un a lungtang uh kisai ziahziah hi. Maizum a om Kimnu’ maitang, puankawt pi a om apumpite a mitkha in bawlkik zel in atawpna ah itna ngaihna thu genmai dingin hong khensat ta hi.
Innmai ah a puansawpte a phopho Kimnu kianglam zuanin hong pai ta hi. Kimnu zong a U Thang hongpai amuh ciangin enngawh ngamlo hi. A U Thang’ gennopthu zong agenma in na theikhol pah bek thamlo in a dawn nading zong kiging khol kei ta hi. Thangno in Kimnu gei hong tun taktak ciangin genngam phalo leh a masuan teng hong ngaihsut kik ciangin gen nailoh dingin alungsim hong kikhel ahih manin bangmah genlo in kilehkik hiaumawk hi. Lupnakhan sung atun ciangin dena a gensawm a gen ngamlohte laidalneu khat tungah hong at khia hi.
****************
Nitak an hong nekkawm in tuni a thupiangte hong kikum uh a zingciang a khualzin dingin hong khensat ta uh hi. Thangno in tusun a Kimnu kiang ah a itna ngaihna thu agenloh hong kisik mahmah hi. Nitak hunbawl in Kapp’ nu leh pan thungetsak uh hi. Zingciang vaipai ding ahih manin lumnuam nailo pipi lupna lam hongzuan uh hi..
Thangno a ihmut theihloh hangin alawmpa aanaa ahih manin a ihmu mahbangin tang hetlo in om hi. A lawmpa ihmu taktak ta a, a upmawhteh thokik khiankhian in sun a a lai at Kimnu’ lupna kongvang nuai pan khumphei hi. Innlim a maanbu sungpan Kimnu’ maan khat alak khit teh lumkik hi. Alawmpa kappu zong ihmu nai hetlo nahi a, Thangno’ gamtatna teng a etsim khitteh, a ihmu na kineihkik hi.
Kimnu zong ihmu theilo in, U Thang tawh a kikhen dinguh ngaihsun in a lung naleng khol hi. Ihmu thei mahmahlo ahih manin lupna tung a tuttoh kik a leh Thangno’ laikoih mu ahih manin hongsim ta hi.
Thangno leh Kappu paiding hita a khut hong ki len ngeingai uh hi. Thangno in Kimnu tawh a kilet laitakun laidal nokhat ngah ahih manin avan suakkik in awng ah valut vat hi. Thangno nuihmaisa in hong pusuak kik a Kimnu kiangah lungdam ei na pai nung ei ci-in khatvei a khutlen kik hi. Kappu nu’n ahih leh Kimnute kizopzia telsiam pah ziau hi.
Thangno te lawmta hong zinkhiat ni a kipan ama uh vang mahmah hi. Gamlak ah alawmta un sing at uh hi. Citak mahmah ahih manin a pute in zong it mahmah hi. Nitak nitumkhit ciangin abawltawm uh thangte siah kawikawi uh a, ameh khopuh zusa vasa bek thamlo in ngal, vom,sakhi, saphu cihte khawng zong man zelzel uh hi.
Thangno in a lupma in thungen in anu’ laikhak simpha kik zel hi. A lung a len ciangin Kimnu’ maan khawng hong enzel hi. Kha khat bang hong cin ciangin apute kiangah sum malak in a innlam uh sum pawlkhat tuak khak uh hi.
xxxxxxxxxxxxxxxxxxxxxxxxxx
No comments:
Post a Comment