(13)
Apa uh kiman cihthu azakciangin Tuangno zong thu hoihtak hong ngaihsun a inn uh anakem anangak ding kuamah omlo ahih manin innlam ciah hong sawm ta hi. Apa akihtak manvua anial ngamloh uh Cingno’ pasal dingpa leh Cingno zong thukim nawnlo pahlian hi. Khaipu
tung zong athumnop pawlkhat om ahih manin akankan uh hang a omna thei zolo uh hi.
Tua ahih manin anau Cingno tawh anih a ciahdingin hong vaihawm ta hi. Ahih hangin Cingno zolzo ngiatlo hi. Apa dan in zawhthawhthu tawh hihsawmlo ahih manin Cingno nusia in Tuangno amahbek kawlgam zuanin hong ciahta hi.
Cingno in nidangpek a akankan mah a u Khaipu pen hong nak kan tektek hi. Apa hong nutsiat akipan apasal dingpa in zong kitheisiam khinta ahih manin a lungsim khempeuhtawh a u Khai kiangah ki ap nuamhi. Tua ahih manin a u Tuangno zuilo in Khaipu a ngaihman bektawh a khawllai ahi hi. A lawm agual eimi amuh peuhpeuh kiang ah dong kawikawi in Khaipu thu akankan hangin kuaman theikhalo ahih manin alung hong kham mahmah ta hi.
Atawpna ah eimi makai zawdeuhte kiangkhawngah hongpai in hong genkawikawi ciangin akiman hi hamtang ding ci in hong ummawh tahi. Akiman te koici suahtaktheih cihthu hong kankawikawi ciangin, Khathum khitteh gamgi ah akipaih na, sumneite tuapan akitat theihna, akitan zolote tuipi tungah sila ding a akizuakna khawng hong kigenciangin hong patau semsem hi.
A sumding hong kisam leueu ahih manin sumleitawi huhna zongin hong vak kawikawi leuleu hi. Nidanga apasal dingpa’n cingno’ hamsatna thu azak ciangin Cingno samin akisamzah ding sum pia hi. Amah zong nidang a vankham sempawl mahhi a tun, alawm aseppih teng akimatkhit atheih akipan kisik in, alungsim kikhel pah a mihuh nopna lungsim nei theita hi.
****************************
Khaipu palikten amatkhit ciangin paliklen ah tawlkhat koih hi. Alawm a kimatkhoppihte pawlkhat pen alawm agual ameltheihten sum tawh hong tankhia ziauziau uh hi. Amah akan leh atan ding kuamah hongpailo ahih manin thongpi (Camp) ah puak uh hi. Tuasungah an nangawn akhamin ngahlo in haksakna namkim thuak hi. Anu apa leh Mangnu phawkin nisimin khakun in om hi. Cingno angaihsut khaksim in na samahmah in mudah mahmah hi. Camp ah khathum sung a omkhit ciangin gamnawl Thai gamgi ah paidingin palikten paipihta hi.
Gamgi atun uhciangin palikte in tuipi ngabeng te tung ah sumneilo akitan zolo teng zuak hi. Khaipu zong amah atanding kumah lamenlo lua ahihmanin kuadakselo in gunkuanglam manawhin apai aleh eimi khat in Khaipu nahia ci a asapteh avapai a leh tuapan akhut a atawi amaan tawh etkakin Paliktekiangah asumte pia in hong ciahpih ta hi. Lampi ah hong kiho uha, Khaipu in kuahiam hongsawl, kuahiam sum hong pia cih a dotdot hangin tuapan gennuam vetlo hi. KL khuapi hong tun uh ciangin tuapan azuisuak nading ngen ahih manin hong kizuisuak uha inn hong tungta uh hi.
A kisil loh sawt ahih manin tung phet hong kisil pah a aman ciangin numeikhatin an thuksa in nakoiha nesak ahih manin hong nehi. Agil lahkial anlim anekloh sawt ahih manin tampitak hong ne hi. Akisil kal in atonpihpa na om nawnlo ahih manin tuanu kiah adot aleh ciah khin, zing ah thai ah hong paikik khalel in teh cihsan ziau ahih manin Thangno in zong bangmah gen nawnlo hi.
An anek khitciangin innlim a tutpha tung kingamin atut laitak kong hongki hong in Cingno hong lut hi. Cingno zong Khaipu amuh phetin nuamlau u Khai acih pheilian leh Khaipu hehlua thakhat hong dingto in, hianu innsung lutsak keivo acihkawmin taiphei in lutsak manlo in innpulam kongkhak mahtawh nilkhia hi.
Thangno in Cingno’ lawmnu dena an aluinu kiang ah ihnu hong tumding aleh kei taikhia ning cihi. Tuanu kiang ah Cingno in a ukhai’ thu gengen ngeikhin ahih manin tuanu in zong tu a a omna uh Cingnu’ inn ahihlam gen tuan nawnlo hi. Cingno zong a u Khai ataikhiat ding deihlo lua ahih manin a inn ah hong ciahlo in mundang ah vagiak hi.
Khaipu zong thu hong ngaihsun in Cingno omna kimah utlo ahih manin Zingsang khuavak phetin hong taikhia ta hi. Gamlapi ah hongpai in khuazin kuan ciangin eimi papi khattawh kituak a huhna ngen inn tuapa nung hongzui ta hi. Pa Piang tungah atuah khak hasatnate agenciangin pa piangte innkuan in hehpih mahmah in nasep amuh mateng amaukiang ah a omnadingin gen hi. Kalnih bang a omkhit ciangin tua vengah nasep khat hongmu hi.
******************
No comments:
Post a Comment