(2)
Thangno’ zinkhiat ni a kipan nu Vung ihmu thei mahmahlo ahih manin alup ding simin zatui (ihmutsuahza) ne tawntung hi. Ahih hangin nitak khat anek ding hong mangngilh kha citciat ahih manin ihmu theilo hi. Thangno’ thu bekmah ngaihsunsun ahih manin Pa Mung zanzun nawn hongthawh ciangin zankim zingsanglam hita ahih manin Thangno’ ading deihtakin thungetna hong neihkik khit ciangin honglup leh hong ihmuthei pahziau bilbel hi.
Thangno hong gui-awk taktak ciangin hong kisikkik pah hi. Kitom in a otgawp hangin a aw suak khia theilo ahih manin hong kipek gawp hi. Kamphatna cidiam, tuahun ian a anu’ thungetsakna cizaw diam hangin a gui-awkna puanten mong kikek in anuai ah hong kiakhia hi.
"Dung!"
A gingdal khat om ahih manin Kappu khanglo vat hi. Laisim kawma tutphah tunga ihmusuak kha ahih lam ki theipan hi. A laibute seng in lupna hong zuat aleh a lawmpa Thangno lupna ah na om nailo hi. Innsung mei tanglai mu ahih manin hong lutphei a leh innlimlai a thallup velval alawmpa hong muta hi.
"Pasalvai kei sicia lawm, keilah zingciang laivuan manpan ding kahih cianga hong tutpih man nailo hiveng . Tuazah taka na lungkhamna bang hi liang ahia?"
"A tompen in honggen pakleng, Nulehpa awiloh pi kongzin a leh Paupite unau in kasumteng hong nektum sak khitteh Ka pano in hong mukhial in palikte hong matsak sawm. Ka sumteng lah beita"
Thangno an agawl na salai in thutam gen zolo ahihlam Kappu in zong theisiam pah hi.
"Lungkham kei o lawm, Kei om laibuang ing ei. Thuman thutak pen nikhatni teh hong kilang veve in cei. Lungneu nading leh tu a dan a ngaihsut ding hikei ei. Naithum satta in tuzan ihmu photni. Zingciang ka laivuan khit a kipan keiman hong ngaihsut pih ningei ihmu photni maw"
Anih un kiho nawnlo uh hi. Aih hangin ihmu lo in alungsim tuak vuah ngaihsun uh hi. Kappu zong alawmpa’ gen azak ciangin a lungnuam hetlo hi. A Pano pen Vankham zuaknatawh tu ma kumthum laipawl akipan hong hauvat hi a, kiphasak mahmah gilo mahmah in asanggam meltheih nangawn don vetlo ahih lam Kappu in zong thei hi. Tuabek hilo in nasem mithahat honkhat nei in a muhtheih phatloh a kilempih phatloh te vuagawp sak thei aih manin aveng apam in gim neih mahmah hi.
Hihthute thei ahih manin Kappu a lawmpa adingin a lungkham mahmah hi. Thangno khuavak kuan ciangin hong ihmu ta a, Kappu bel ihmu nawnlo in alaite tawmvei a etkik khitteh kisil in laiphi dingin hong kuankhia hi.
Thangno a khanlawh leh nitak lam na hita ahih manin kisil dingin hong kithawi pah hi. Zan a a zunek am lai leh thophet dingkhia vat ahih manin kongkhak gei atun the alungam in tuk dektak hi. agei a innphiat a om Kimnu( Kappu’ nau) in mu ahih manin na pomphei man hi.
"Sorry peuh mah ei Kimnu"
"Na lung a aplai leh lumkik photve u Thang"
"Phamawh kei e, kisil leng hong hoihpah lel in teh."
Kimnu in mainulh khat pia a Thangno hong kisil hi. Thangno a kisil
kawmkawm in dena Kimnu in a pomna hong ngaihsun kik in alungtang bang kisai vatvat kei hi. Kisilna bukpan hong pusuahkik ciang in Kappu na tungkik khinta hi.
"Nang hongtungkik tamaw? Lai na phithei hia leh?"
"Upmawh sang hoh phi thei kisa gawpmah ing e"
"Coffee na donvo u Thang limta kei leh"
Kimnu in coffee a piak kawmin Thangno’ mainulh sensak hi. Dena teng hangin amaizum lai hi. Kappu a pate khan ah lutpheisuak ahih manin Thangno amah bek in Kimnu thu ngaihsun hi. Nidang a a veng naupang nonu Kimnu zong nakamsiam thei keita hi. Amel lah hoih in lah kamsiam lai ahih manin Midang pasalkhat adingin a iplah huai mahmah numeikhat ahihna te hong muta hi.
"Innlam lai nakhak nop leh ka pate zingciang kahtoh sawm hiven"
Thangno zong hong ngaihsunsun in a gending lah theilo amai zum aihmanin laikhak nailoh dingin hong khensat hi. Nitaklam ciangin lawmta un pusuakkhia in niang tuisai ah hong tu uhhi. Kappu in a tuahkhak thu teng dong ahih manin Thangno in kicing tak in hong gen ta hi.
xxxxxxxxxxxxxxxxxxxxxxxxxxxx
No comments:
Post a Comment