(1)
Zankim ta ahih manin Kawlpi khuanawl khaikam lam dai mahmah ta hi. Kalay University paina lampi meitang deudau vang cihloh mundangteng zing khipkhep hi. Ahih hangin Kappute’ inn ah meitang lai hi. Mei atan hangin kuamah apauaham omlo in dai didehi. Inndei sungah Thangno amahbek zudawn in om hi. A lungkham tuak mahmah hi.
Thangno suangkhuklam sumzong dingin nu leh pa phallohpi mahin hong paikhia a, alawmte’ khemna atuah banah, a pano in mukhial lai in,a vuakgawp khitciangin Palikte man dingin zongsak lailai hi. Thangno zong acih nading atheihloh teh alawmpa Kappute inn ah hong busim ahi hi. A lawmpa Kappu lah laiphi (exam) laitak ahih manin Thangno hong tutpih manlo a Thangno zong alunggim lua in zu hong dawnsuk ngekngek ta hi.
Amau tegel pen aneu a kipan sangkah khawm, lawmta bekthamlo in vengta hilai ahih manin asuk ato a kithuah, aki-it mahmah khat hi uhhi. Ahih hangin nungkum in Kappu' pa in anasepnamun (Zato nasem) Kawlpi Zato ah hong kituah ciangin Kappu te innkuan tawh hong kikhenta uhhi. A lawmpa Kappu a om nawnloh ciangin Thangno zong lawm ginalo vive tawh hong kikhawl kha in, tun zong a sangkah masuan nusia a, nulehpa’ phalloh pimah alawmte tawh hong zinkhia a hihi.
Thangno in a zudawn kawmin abeisa thute hong ngaihsun kikkik hi.
"Tan 10 phikhit mateng zin theilo ding ka cici veleh"
Pa Mung pen galkaplui khat ahih manin kamzol zangthei kholloa, atate’ ading deihsak mahmah hi. Nuntakna haksa sapipi mah in a tate’ pilna saang aneih nading deihsak in hilh den hi. Thangno pen uzaw hi a, aneu a kipan lailam zokhollo in sumzon ding bekbek ngaihsun zaw hi. A inn ah zong tamom ngei khollo in hunawng angah nakleh a vengpa Kappu te innah tam om zaw hi.
Anaupa Khaipu pen apa’ deihsakna mah bangin lailam hong zomawhlo ahih manin nulehpa leh siate genloh aveng apam in pakta mahmah in maipha ngah mahmah hi. A nu’ damloh a kipan innnasep khempeuh zong buplak bekthamlo in nasep lah kizen aih manin Nulehpa’n zong pakta mahmah hi.
Thangno pen aneu aki pan in Lai lam a uk melloh mah bang in zo khol heto pahhi. U zaw lungsim paai cidiam hamsapi leh gentheipi a sang akahsang sumzon ding bekbek lunggulh zaw hi. Apa'n lah kumpi nasem ngei khat ahih man in sangkah pina sin dingbekmah nakpi takin hanthawn hi. A nau Khaipu pen apa deihsakna mahbang in laiam hong ukmawhlo ahih man in apa mai muzaw pah mawk hi.
Tua ahih manin Thangno pen aneu tung akipan tai lah han bekbek thuak in Nulehpa lungkim nading in khatveibeek om ngeilo mah hi. Inn nasep nengneng nangawn anu huh ngeilo in hun awng angah nak a leh vengte kiang a tung pahpah khat a hihi.
**************************
Thangno in zu adawn kawmin abeisa thute hong ngaihsun toto a, kisikmahmah hi. Khemtuak in sum pekkhat nangawn neilo bek thamlo, Palikte leh a Pano’ matding laua, hihbang dinmun hongtun ciang in anu leh apa’ mailah zuankik ngam nawnlo ahih manin a masuan bing mahmah ta hi. A lunggimlua ahih man in amasuan ding a ngaihsut kawmin, a zuthawl sunga om zute avek in dawnkhat hongsuah ta hi.
"Thangno zana na bicycle zat kua kiangah nusia na? Napan denteh zang nuamding ai maw?"
Thangno in a dawnkik pakloh ciangin nu Vung in theipah ahih manin, Thangno lawkgawp in hong dot leh Thangno inzong honggen khiata hi.
"Paupite unau tawh khualzinsawm kaih ciang a,kapa’ bycycle nazuak kha mah hi’ng ei nu. "
Thangno kisuangtak ahih manin a genkhitteh hong kilukhuh kik hi. Nu Vung zong a upmawh banglian honghih takpi ciangin ,heh+dah mahmah hi. Ahih hang acih nading dang omtuanlo ahih manin
"Ki awi takmah cei, Thangno!, na khualzin ding hong ki awiloh kawmkal ah, nang napa' khe (Bycycle) nangawn zuaksak ngamlai nahih takin maw.."
Nu Vung in a genkawm in a khitui hongluang ahih manin Thangno zong omthei nawnlo in, a lupnatung hong tuto a,
"Khialmah ingei nu aw, tu adan hih kei lenglah cikmah a zinkhia zo ngeilo ding kaih cianga, hihbanga ana gamtakha himah ing. Kapa zong haksapi taka sum azon leh, ih zawnman a gilpina napum thuaknate ka ngaihsut ciang, omthei nawnlo a keimah hong kipekkhia himai ingei nu."
Thangno in anu pomin cikmah huna agen ngeilohthute hong genta hi.
"Bangbang ahizonga nulehpa’ thumanna sanga hoihzaw omlo hihvehaw Thangno. Tunbel hihciang tungsa kenzong hongkham nawndah maining in, napa’n hongtai leh dawngkik mahmah kenmaw Thangno."
"Aw leh nu."
Pa Mung hehmai sa in kongkhak ah hong lutphei ahih manin, a thugen te zakhin ahihlam Thangno in tel pah a, apa’ mai en ngamlo in hong kuncip hi.
"Khup Khua Thang, hilhtheihloh, taitheihloh, nanglehnang hi kisa mahmah nahihleh tu mahmah in zin khia o. Namai zong munuam nawnkeng ei. Zong hongciah nawnkei o"
A gen khitphet in Pa Mung innsung ah lutkik hi. Nu Vung in apa kampaute asan khialhloh nadingin Thangno kiangah awdam
takin genkik hi. Thangno anau Khaipu’ khan ah hongpai in thu pawlkhat vaikhak hi.
"Lung himawh kei o u Thang, Ih nu na nasem sak mahmah kei ning ei. Nang zong hong tuahpha in la sum tampipi hong khak o leh u Thang"
Khaipu in a U Thang kha dingin avante pua in hong pusuak hi.
"Thangno na cidam nadingin kidawm inla, lawm gina lo pel in maw. Lai hongkhak zel o. Kobel thunget sakna lobuang kong huhtheih nading uh thei kong ei."
"Kei ading bangmah nalung himawh kei vo nu. Nang nadawm zaw o, Siavuan ten ih ki-at khiat zawhvet mateng nasem theilo ding hong cih aimaw."
Nu Vung in Nu Vung in bangmah dawnkikna nei tuan nawnlo hi. Thangno in anu khut alet damtak in hong khah ciangin ki-ip zo nawn mahmahlo ahih ciangin a khitui hong luangkhia ta hi.
******************
Thangno in innpan hong paikhiatlai thute amitkha ah mukik in a khitui hong luang hi. Aden teh thakhat in hong dingto vat in sabuai tungah tutphah akoihtoh khitteh hong kahto hi. A puanten suahkhia in kawmzawl tunga siktukkilhtung aban khitteh gui-awk dingin hong kithawi ta hi.
Nihvei thumvei hong ngaihsun phakik hi. A tuahkhak thute, a puak vante giksa lua leh Nulehpa’ mai mukik ngam nawnlo ahih manin atawpna ah..-
"Nu leh pa aw, hong maisak ta vo"
Akam pan acih khit teh Thangno amah len amah hong gui awk taktak ta hi.
xxxxxxxxxxxxxxx
No comments:
Post a Comment