(10)
Mangnu te nuta in amau bangmah theisaklo in Pamungte kawlpi a napai ziau ciangin alunguh nuam hetlo uh hi. A diak in Mangnu in a lungsim ah a u Khai in sum khakzo ngeilo a Thangno khaksa hilai ahih manin kisuangtak semsem hi. A u Khaipi kiang pan sumgenloh thuna ngawn aki zakloh khaguk valbang hong hita ahih manin Mangnu in lamdang lahsa in alung zong hongkham mahmah ta hi.
Mangnu aneu tung akipan tagah ahih manin kuamah lawmlehgual zong neilo in u Khaipi bek mahtawh akithuah thei ahi hi. Tangvaldang a na hopih piante zong kuamah ki lamensak lo in, kuamahdang ngaihtheih dingin zong tuat vetlo hi. A Lungsim khempeuh piakhia a u Khai a itna te hong ngaihsun to kikik hi.
"Mangnu, Man nailo maw "
Nidang a Nu Vungte kiang hawhding alawp mahmah hi napin tunpen hong lawp nawn hetlo hi.
Pa Mung ten tuni lungdamkoh annekkhopna neiding ci ahih manin anuta un hong paito uh hi. Pa Mungte in atun ciangin Pa Mung in
Thangno’ khak sumteng tawh inn atatkik zawhna lungdamkoh annekna ahih lam honggen khit ciangin hong kiho ngeingai uh hi.
Pa Mung te nupa in Thangno hong puankhak ci-in puanthak tuak silh uh hi. Thangno in a nau Khaipu inn ah a om mahsa ahih manin Khaipu a ding zong khak hi. Tuni pen nu Vung lah cidam ta, inn lah tanzo kik lungdam mahmah ding ni ahih hangin alungsim sunguh ah Khaipu phawkkha tek uh ahih manin alung nuamthei tuanlo uhhi.
Mangnu bangin a haza ahih hetloh hang tu a a u Thang’ munah pen a u Khai hizaw leh ci-in ngiahsun kha zel hi. Nidanga anu leh apa a lungkimsak pen Khaipu hizaw a, Thangno ahih leh inn nangawn a omman ngeilo nu leh pa a sinkham saksak khat hizaw mah hiven cihkhawng hong ngaihsunsun hi. A u Khai lah tudong thukizalo in om ahih manin a damdam mah ahitam cihkhawng ngaihsun in tuani zan thapai bang ih muthei vetlo hi.
Nu Vung aki atna meimate hongdamin tha hongnei semsem ta hi. Inn nasep akipan nasep khempeuh bangmah huh kul nawnlo in semzo ta ahih manin Mangnu zong honghawh ngeinawn khollo hi. Asawtlo in Thangno kiangpan laikhak leh sumpawl khat hong tung leuleu in Thangno in inn puah nading sumkhak ahih man in Pa Mung in zong hoihtak in a inn uh hong puahpha sak hi.
***********************
No comments:
Post a Comment