( 7 )
Galkap luite’ tate abat in malay kipaithei ding cihthu hongom ahih manin, Pamungte innkuan in Khaipu paisak ding hongsawm ta hi. Laibu (passport) bawl nading leh zangkong dong lamsap ding tampi kisam veve ahih manin a inn uh tengli tawh hong pong uh hi.
"Inn napon liang uhsang vokte kelte zuakzawlo a u Vung?"
"Kozong acipian mah hive ung, Khaipu in Kel zuakding phal vetlo a. Tuabek hilo nunga, a u Thangno’ vai zong sum kisam aih cianga innmah ponloh hong phamawh hiveh aw”
Nu Vungte unau niangtui nekkawm in hong kiho uh hi. Khaipu leh Mangnu zong kiho in thu hong ki vaikhak kei uh hi. Mangnu' nu in ciah ding hong genta ahih manin Khaipu in zong gen nopteng hong gen samsam hi.
" Mangnu dena kong gente na mangngilh ken maw., Ka nu mahmah hoihtak na donsak in la, kumnih khitteh hongciah ning in tua a kipan hong nusia kik ngei nawnkei ning ei maw"
"Awleh, u Khai, nangzong na cidam nadingin hong kidawm inla lai hongkhak zel o maw"
Mangnu te nuta aciah khit uh ciang in Khaipu te zong hong lumta uh hi.Alup pah uhhang Khaipu ihmu theilo in thu ngaihsunsun hi.
*********************
Kumnih hong cingta ahih manin Khaipu zong Malay pan hongciahta a, Kawlpi a tunteh Motorcycle khat lei in tuatawh innlam ciahto hi. Mangnu in khuanawl ah nadawn a Khaipu hongtunteh hong kipom hong kinam kei uh hi.
"Mangnu konggen ngei khat naphawk laina?"
"Bangpen maw na gennop u Khai?”
"Kong tunkik akipan hong nusia kik ngei nawn keining kacih pen e”
"Thei lai mah e. bangcin maw u Khai?"
"Zing ciang mopawi bawl pah ding .Tua khitteh,,"
“Inn ciah masa phot ni u Kha,i Ih nuten zong hong ngaklah in teh"
Inntung nailo ahih lam kiphawk pan ahih manin nui heihai sa in Mangnu a cycle nungah ten in innlam hongzuan uh hi. Inn a kigal muh ciangin, Mangnu in hopih hi.
"U Khai nunga nong sumkhak tawh Ka pa Mung in inn a puah hiven bangci nasa a leh innthak?"
Khaipu in a inn a galet a leh hoihsa mahmah in lamdangsa mahmah hi. Innmai panin anute in na nadawn in khut navan kei uh hi. Innmai atun uhteh a cycle khawlthei nawnlo a, a belek akan hang honghat semsem zawsop hi. Mangnu leh nu Vung dahlua in awng uh hi. Ahih hangin a cycle khawlthei tuanlo in hat semsem a ahekna nangawn hong kihekthei nawnlo ahih manin Khaipu zong hong linglawng kei ta hi.
"Khaipu, khaipu tho ta o leh"
A cycle akibut lianleh khanglo vat a, a mang nahi hi. Zan ihmu pak thei lo ahih manin a khangma ahi hi. Amai aphiat khitteh Mangnu in a guansak sa a van la in mawtaw hongpai ciang a paithei pahdingin a kiging sa in om hi.
" Nu kapa e, tho nailo maw?"
"Tho khin e, kelnawi avasuk pak hin teh"
"Aw"
A masep ngei a masuan khempeuh a pa’n a sep kul tading cih ngaihsun in alung hongnuam hetlo hi. Nidang in ngaihsun khangei lo hi. Mawtaw hong paita ahih manin, apa tawh zong kiho man nawnlo in hong paikhia hita hi. Mundang pai ngeilo ahih manin a gamtat ngeina munte abanban in hongkheng toto in ama a dingin munthak vive hong hiziau ta hi.
*********************
No comments:
Post a Comment