(15)
Thangno zong lungkhamin ahihtheihzah in akankan hang Khaipu thupeuh mah koimah ah zalo hi. Tualaitak Tedim a pastor khat Malaysia paiding cihthu za ahih manin Thangno in anu kiangah Khaipu kan nading Malay a om eimi makaite kiangah huhna laikhat puasak leng ci in gen hi.
Nu Vung zong Thangno gen azak ciangin laipuasak keini in la nangmah ngiatin vazui lecin namuh madong zongthei zawding leh hong tonthei pahding nahih uh teh ci-in Thangno sawl hi.Thangno zong anau Khaipu hang a anu lungkhamna aliat mahmahna thei ahih manin Malay paidingin hong kithawita hi. A paikhiat ding ciangin anu kiangah kanau kamuh madong hong zong ningin kanih un hong ciahkhawm nungei na lungkhamvei o ci-in vaikhak hi.
Thangno malay hong tunphet akipan khaipu kanin eimi tamnamunte, biakinn tuamtuam leh kipawlna makaite kiang ah hong vak kawikawi hangin kuamah in nathei khalo uh hi. Khawmpi hong kipanta ahih manin Khaipu amuh khakleh ci-in kikhopna biakinnpi huang lutna konggei ah pang hi. Kikhawm ding eimi tampi tak hong paihangin anau Khaipu kihel lo hi. Azing athai ah mi hong tamsemsem ahih manin anauzong hong kihelkha hamtang dingin lamena apandet hang khawmpi hong mansiangta a anau muzo tuan lo hi.
Thangno mah bang Khaipu a zongzong numei khat om hi.Thangno in amuh hangin tuanu lungkhamtuak in maitai lolua ahih manin hopih ngamlo hi. Tuanu pen Cingno hi a, Khaipu zong dingmah a hong pai ahi hi. A u Khai azon kawikawi naleh a lungkham luatnate hangin alungsim tavai gawpta a tunzong hihpawi pen a u Khai azon tawpna dingin khensat a hongpai ahi hi. Atawpna ah muzo tuanlo ahih manin a ipsung a aneihlaisun ahi alawmte tawh akiho akithuzakna a handphone apaih khitciangin biakinn nungngatin hong paikhia ta hi.
Thangno zong acihna ding theinawnlo in alung hongkham mahmah ta hi. Anu kiangah avaikhaksa mahbang in anaumu lo a amahbek aciah ding lah piangsa vetlo ahih manin pailama atonpih siapa kiang ah ana ciahsan nadingin hong gen ta hi. Siapa zingciang ciah tading ahih manin anute an lungkhamloh nadingin vaikhak hi.
Tualaitak phone hong lut in mikhatin siapa kiangah thu angatsak nading kun ahih manin siapan zong amin leh thunget ding a lunggulhna thu dong hi. Thangno in a phone kiho uh azakciangin anau Khaipu hikhading in lamen pah ahih manin siapa kiangpan phone ngen in ahopih aleh azonzon anau Khaipu na hitakpi tahi. Khuazan taleh a omna un kigamla ahih manin a unau un zingciang kimu dingin hong kiciam uh hi.
Azingciang in a unau in hong kimuta a lungdamlua in hong kikawi uh hi. Khaipin apa nusiat khitlam Thangno genteh theipan ahihmanin lungdamna leh dahna khitui hong nulkhawm uh hi. Ciahpah ding asawm uh hangin vanleng letmat ngahpahlo ahih manun hong tamlai uh hi. Thangno’ tamna inn ah hong pai uhleh Thai gamgi pana apipa tawh hong kimu ahih manin Khaipu in asumvai hong genpah a, Tuapan zong ama sum hilo a Cingno’ a ahihna, thu leh la khempeuh Cingno in abuaipihna te leh Cingnote inn pan ataikhiat akipan Cingno lungkham mahmah dah mahmah in amah a zonzon nate hong gen hi.
Khaipu zong tuathu a theih ciangin Cingno abawlnate kisik mahmah in a inn ah hong paileh Cingno na om nawnlo in alawmnu bek na om hi. Khaipu amuh ciangin alawmnu Cingno tung a agamtatnate hangin madah mahmahin hopih nuam paklo hi. Ahihang in Khaipu in kisikna kammaltawh dong ahih manin Cingno thu atheih bangin hong gen ta hi.
Khaipu a innpan ataikhiat khit ciangin Cingno sumnei nawnlo ahih manin aneihsunsun (handphone lobuang) TV, DVD leh akizuakthei vante zuakin a zong dingin kuankhia hi. Inn ah zong ciah gina ngei mello in kan kawikawi hi. A paikhiat cillam in bel alawmnu tawh kithuza zelsam uhhi. Ahi zongin nungkal sungin alawmnu kiang hopih in tukal sung a aciah kei a leh aciahnawnlo ding ahihna leh bangmah ana lungkhamloh nadingin vaikhak hi.Nipini hong cingta in Cingno ciahtuan lo ahih manin alawmnu lung himawh in a phone a setset hang Cingno’ phone ki set thei nawnlo hi.
Tuni pen nipizawh ninga ni hita ahih manin Khaipu alungtang sukha mahmah hi. Cingno tung a agamtatkhialhna atelkhialhna te kisik mahmah hi. Cingno’ in bangzahtaka nasa ding cih thei hi. Cingno in a thuak laitak lungduaitak a athuakzawh hang, tun phone zong ki set theinawnlo ahih manin ava zon hang a muzo dingin ki lamen vet nawnlo hi. Hih leitung ah Cingno akici a omnawnlo, a om phiallai aleh zong amukhakik ngei nawnlo dingin kituat ta ahih manin dah mahmahsa in Cingno, inn pan hong ciahkhia kik ta hi.
Nikhat hun ngahlai ahih manun Khaipu in a u Thang KLCC ah paipih in agei a huan sungah hongvak uh hi. Nim dildial huan sungah avak uh hangin Khaipu’ lungsim sung sa mahmah hi. KLCC innpi a galet kawmin Khaipu in a u Thangno kiangah Cingno’ thu gen hi. Khaipu in Cingno tawh apaikhop lai a atutna ngei uh phawkkha ahih manin agal et a leh numei khat na tu takpi hi.
Khaipu zong Cingno khawng anahih khakleh cih ngaihsun ahih manin akiho kawmin tualam mahnawhin hong pai uh hi. Ageinai atunkuan uhteh a etleh numei takpi samphialh nengnang puannin niapnuap silh khat na tu ahih manin tualam paisuak nawnlo in akhanga tuizeu omna am paisuk in maam kizaih uh hi. Paiphei suakin ageipan en hile uh Cingno ahihlam theipan dinghi. Cingno alungsim man nawnlo in a u Khaitawh aki thuahngei na mun teng ah paikawikawi in om hi. Abeisa hunte thei nawnlo ahih manin amah a lung khamkham nawnlo hi.
Nitaklam hong hita ahih manin Thangno te unau zong tuamun pan ciahsuak uh a, zingciang innlam zuanta ding ahih manun avanlei teng uh hong guangguang ta uh hi. Zingsang khua hongvak ta a Thangno te unau a tuanna uh vanlengin Malay leitang nusia in kawlgam manawhin hong leng ta hi.
***************************
No comments:
Post a Comment